Фудбалската федерација на Македонија продолжува со сериозни инвестиции во спортската инфраструктура, а 2025 година е заокружена со уште еден значаен проект. Комплетно е обновен теренот број 1 во тренинг центарот „Петар Милошевски“ во скопската населба Ново Лисиче.
На овој мини-стадион е поставена целосно нова тревна подлога, со современ систем за наводнување и нова дренажа, со што значително се подобруваат условите за тренинзи и одигрување натпревари. Проектот овозможува теренот да ги исполнува највисоките стандарди, какви што заслужуваат македонските репрезентации.
Првиот човек на ФФМ, Масар Омерагиќ, истакна дека теренот и понатаму ќе биде достапен и за одигрување натпревари на дел од прволигашките екипи, а ќе го користат и младинските репрезентации, како и А-репрезентацијата за тренинг активности.
Со оваа инвестиција, македонскиот фудбал доби уште еден модерен терен, што е јасен сигнал дека ФФМ останува посветена на унапредување на условите за развој и напредок на фудбалот во земјава.
