Рефлекторите ќе светнат на стадионот „Петар Милошевски“ во Битола, токму на дербито меѓу Пелистер и Вардар, кое се игра во рамки на 11. коло од Втората македонска фудбалска лига.
Продажбата на билети веќе е започната во Битола, а поради зголемената заинтересираност за натпреварот, секој ќе мора да поседува билет за истиот со исклучок на навивачите и љубителите на спортот кои веќе имаат обезбедно сезонска или ВИП карта.
Во недела продажбата на билети на стадионот „Петар Милошевски“ ќе започне во 16:30 часот до 18:30 часот.
„Интересот за натпреварот помеѓу Пелистер и Вардар е голем. Затоа Фудбалскиот клуб Пелистер апелира сите гледачи да дојдат на стадионот порано и да си обезбедат билети. Во спротивно клубот не може да гарантира навремен влез на стадионот. Вратите на стадионот се затвораат во 18:30 часот, половина час пред почетокот на дуелот. Апелираме навивачите од двете екипи спортски да го поддржат својот тим во согласност со прописите и законот, без извици и пароли на национализам, расизам и слично. Внесување на тврди предмети (запалки, лименки, шишиња, алкохол, оружје итн.) ќе биде строго забрането“, се вели во соопштението на ФК Пелистер.
Поддршка пристина и од градоначалникот на општина Битола, Тони Коњановски.
„Почитувани граѓани, драги битолачни и љубители на спортот, би сакал да Ве поканам како градоначалник во предвечерието на големиот празник 4 ноември кога годинава славиме 80 години од ослободувањето на Битола на 3. ноември на големото дерби помеѓу Пелистер и Вардар овој пат под рефлектори на стадионот „Петар Милошевски“ заедно со „Чкембарите“ да направиме спектакуларна атмосфера да дадеме и ние придонес во одбележувањето и на големиот празник меѓутоа и на овој натпревар кој еве првпат се организира под рефлектори во Битола“, рече градоначалникот Коњановски.
Дерби натпреварот меѓу Пелистер и Вардар ќе започне во 19 часот, а главен судија задолжен за правдата ќе биде Јован Качевски од Струга.
