Втората македонска фудбалска лига во иднина би можела да има уште едно кратење, оваа сезона е последна со 16 екипи, бидејќи од следната сезона 2026/2027 второлигашкото друштво ќе брои 14 екипи.
Но, како што истакна претседателот на ФФМ, Масар Омерагиќ во новогодишното интервју вели дека се размислува за уште едно кратење на Втората лига.
„Убеден сум, оваа првенство се убедив и самиот себеси дека е исправна одлуката за крање на Првата лига од 12 на десет екипи. Убеден сум дека и Втората лига уште еднаш да донесеме одлука да ја скратиме, сега ја кратиме од 16 на 14 екипи, да ја скратиме на 12 екипи. Со новиот статут одиме на региони. Новиот статут ќе биде усвоен на почетокот на наредната година со што ќе донесеме нова организација на фудбалската федерација, каде што Општинските фудбалски сојузи нема да бидат чинители туку ќе бидат регионите. Останува отворено прашањето да дискутираме дали Третите лиги ни се потребни, бидејќи има многу клубови во Општинските лиги кои не сакаат да бидат први за да влезат во Трета лига бидејќи им е и скапа, но дискутабилно е со квалитетот. Нас сепак тој аматерски фудбал треба да ни биде да младите играат фудбал, да се натпреваруваат“, вели претседателот на ФФМ, Масар Омерагиќ.
Покрај Втората лига од следната сезона се крати и Првата лига од 12 на десет екипи, а промени се најавуваат и во Третите лиги и Општинските лиги.
