Историскиот пласман на Шкендија во елиминациската фаза од Конференциската лига на УЕФА не помина незабележано.
Македонскиот шампион доби официјални честитки од Фудбалската федерација на Македонија и од претседателот Масар Омерагиќ, кои го истакнаа значењето на овој успех за македонскиот клупски фудбал.
Од ФФМ потенцираат дека настапите на Шкендија на европската сцена претставуваат силна промоција на македонскиот фудбал и потврда дека домашните клубови можат рамноправно да се натпреваруваат со екипи од посилни лиги.
„Фудбалската федерација на Македонија и претседателот Масар Омерагиќ упатуваат искрени честитки до Шкендија за изборениот пласман во елиминациската фаза од Конференциската лига на УЕФА.
Успехот на Шкендија е резултат на професионалниот пристап, тимскиот дух и амбицијата за докажување на меѓународната сцена, а воедно претставува и значаен придонес за промоција на македонскиот клупски фудбал во Европа.
Со надеж за уште поголеми успеси, им посакуваме на фудбалерите и стручниот штаб на Шкендија квалитетни настапи и достојно претставување во продолжението од европските натпревари.“
Во плеј-оф фазата од Конференциската лига, тетовчани ги очекува двомеч против Лех Познањ од Полска или Самсунспор од Турција, а името на противникот ќе биде познато по ждрепката во јануари.
Шкендија со овој успех уште еднаш го потврди својот статус како еден од најстабилните македонски претставници во европските натпреварувања.
