Со сигурна и доминантна игра, Куманово ја совлада Струга со убедливи 32-19 и на најдобар можен начин ја затвори 2025 година. Ова е третата победа за кумановскиот тим сезонава во Супер лигата.
Дуелот беше неизвесен само во воведните дваесетина минути, по што домаќините ја презедоа контролата и на паузата заминаа со предност од 15-10. Во продолжението, Борјан Цековски со серија голови ја донесе првата двоцифрена разлика (21-11), по што победникот беше јасен.
Александар Стојков и Цековски беа најефикасни кај Куманово со по шест погодоци, додека кај Струга најмногу се истакна Стефан Атанасовски, исто така со шест голови.
Со овие бодови, Куманово се искачи на 10. место со седум поени, додека Струга останува 11-та со шест бодови.
