На 77. Конгрес на Европската џудо унија, одржан во Лас Палмас, Џудо федерацијата на Македонија испиша историја освојувајќи две исклучително значајни европски признанија.
Федерацијата беше официјално прогласена за Најдобар европски организатор за 2025 година, како резултат на беспрекорната организација на Европското првенство за кадети и на Европскиот младински олимписки фестивал (EYOF). Овие настани беа реализирани со врвен професионализам, одличен менаџмент, силна меѓународна соработка и исклучителна грижа за сите учесници, оставајќи траен и позитивен впечаток кај националните федерации од цела Европа.
Дополнително, Европската џудо унија му го додели престижното индивидуално признание „Hero of the Year“ на претседателот на Џудо федерацијата на Македонија, Владимир Трпаноски, како признание за неговото лидерство, визија, континуиран придонес и значајна улога во промоцијата и развојот на европското џудо.
Признанието е официјално потпишано од претседателот на Европската џудо унија, д-р Ласло Тот, на 14 декември 2025 година и претставува уште една потврда за високото реноме и угледот на македонското џудо на европската сцена.
