Вардар ја забележа новата победа во првенството, совладувајќи го Радовиш со 40-26, во натпревар во кој „црвено-црните“ постепено ја градеа предноста и уште на полувреме водеа со 22-13.
Иако настапи со комбиниран состав и без неколку стандардни првотимци, Вардар без проблеми ја контролираше играта и постигна дури 40 голови. До 40. минута предноста изнесуваше плус 12, а речиси половина од погодоците ги реализираа Николас Боно и Мигуел Пинто.
Боно натпреварот го заврши со 11 погодоци, Пинто додаде девет, а пикерот Кристијан Атанасовски реализираше осум гола. Шанса добија и Марко Богдановски, Марио Танковски, Харуки Кавада, како и останатите ракометари од поширокиот ростер.
Радовиш, кој допатува во Скопје со нов тренер- Љупчо Мијалов, останува на дното на табелата со 17 порази сезонава и сериозна закана за испаѓање од лигата.
Во последното коло од годината, Вардар гостува во Прилеп, додека Радовиш на домашен терен ќе го пречека Охрид.
