Македонската ракометна репрезентација го финализира календарот на активности во пресрет на Европското првенство 2026, каде повторно ќе биде дел од најголемата континентална сцена. Националниот тим ќе одработи динамична програма со четири контролни пресметки и подготовки во Пореч, Скопје и Винтертур.
Подготовките стартуваат на 22 декември, кога селекторскиот штаб ќе го собере тимот за првпат пред големиот турнир. Само неколку дена подоцна, репрезентацијата ќе замине за Пореч, каде што ќе тренира заедно со светскиот вицепрвак Хрватска. Во рамките на тој мини-камп ќе биде одигран и првиот пријателски меч, закажан за 28 декември.
По хрватската етапа следува враќање во Скопје, каде ракометарите ќе продолжат со тренинзи до заминувањето за Швајцарија. На 7 јануари тимот патува за Винтертур, а веќе на 8, 9 и 10 јануари Македонија ќе биде дел од традиционалниот „Жолт Куп“, турнир на кој ќе се соочиме со селекциите на Швајцарија, Бахреин и Украина.
Веднаш по последниот натпревар на турнирот, репрезентацијата без пауза ќе замине директно за Данска, каде се планира уште едно последно тест-надмерување против противник што дополнително ќе биде потврден.
Македонија на Европското првенство ќе игра во Хернинг, во елитната арена „Јуске Банк Боксен“, а ривалите во групната фаза ќе бидат Данска, Романија и Португалија. Мечевите се закажани за 16, 18 и 20 јануари.
Со јасен и добро темпиран план, македонскиот национален тим влегува во завршните подготовки со цел да биде максимално подготвен за уште еден голем ракометен предизвик.
