Есенскиот шампион во Трета лига – Север, тимот на Еуромилк од Горно Лисиче го промовираше првото зимско засилување – официјално нов играч е Димитар Стојановски.
Поранешниот прволигаш кој нема пораз во есенскиот дел во Трета лига – Север цели кон враќање во Втора лига, се подготвува за пролетниот дел, но се гради тимот повеќе и за баражот за можен влез во ВМФЛ.
Стојановски е 20-годишен фудбал кој потекнува од фудбалската школа на Силекс, низ својата кариера беше дел од младинските категории на Њу Старс и Вардар, а настапуваше и за третолигашите Овче Поле и Пчиња.
„Со голема чест и уште поголеми амбиции го претставуваме најновиот играч во нашиот тим! Фудбалер со страст, борбеност и победнички менталитет — токму профилот што го бараме за да одиме чекор погоре. Брзина. Вештина. Тимски дух. Подготвен да остави срце на терен и да го носи дресот со гордост“, истакнаа од ФК Еуромилк ГЛ по промоцијата на Стојановски.
Во есенскиот дел на Трета лига – Север екипата на Еуромилк ГЛ стигна до учинок од 12 победи и едно реми и 37 бодови на своето конто, пет повеќе од второпласираниот БВК Коњаре.
Пролетниот дел од сезоната тимот од Горно Лисиче го отвара на домашен терен против Студеничани.
