Ракометарите на Охрид се вратија од Кавадарци со убедлива победа од 31-19 против екипата на Тиквеш, потврдувајќи дека се во одлична форма пред дуелот со шампионот- Еурофарм Пелистер. Од самиот почеток, гостите ја презедоа контролата на теренот и најавија дека ќе доминираат во целиот натпревар.
Веднаш по натпреварот, тренерот на Охрид – Борис Ројевиќ, во изјава за Спортска Мрежа, истакна дека тимот добро се подготвил за овој ,, тежок терен “, а силната одбрана и одличната работа на голманите биле клучни за убедливиот резултат, додека тимската атмосфера им дава дополнителна самодоверба пред дуелот со Пелистер.
,,Кавадарци важи за многу ,,тежок“ терен и добро се подготвивме, со голем респект кон противникот. Одбраната ни ја донесе убедливата победа, а посебно тоа што го примивме првиот гол во второто полувреме дури во 17. минута, со одлични голмани. Атмосферата во тимот е навистина одлична од првиот ден – дишеме сите како еден и во таква атмосфера го дочекуваме и Пелистер.”- изјави Ројевиќ за Спортска Мрежа.
Охрид доминираше во текот на целиот натпревар, имаше моќна серија од девет погодоци по ред во второто полувреме и контрола од почеток до крај. Победата не само што донесе бодови, туку и самодоверба пред големото дерби во СРЦ „Билјанини Извори“.
Во следното коло, Охрид го пречекува шампионот Еурофарм Пелистер, додека Тиквеш ќе се сретне со Еурофарм Пелистер 2.
