Македонија ЃП приреди вистинско изненадување и среде Неготино го совлада фаворизираниот Вардар со 31:32, дополнително комплицирајќи ја битката на „вардарци“ за директен пласман во Суперлигата.
Натпреварот од 13. коло во Првата лига започна изедначено. Гостите од Скопје рано поведоа со 1:3 и 2:4, додека домашниот тим постојано бркаше резултат. Вардар Неготино првпат стигна до предност од два гола во 19. минута (12:10), со погодоците на Пеовски и Орешков. На полувреме домаќинот имаше минимално водство од 20:19.
Вториот дел донесе целосен пресврт. Македонија ЃП влезе многу подобро и од 26:24 направи серија за водство од 26:29. Нападот на Вардар беше во целосен пад, а гостите сурово ги казнуваа сите грешки.
Вардар Неготино во последните четири минути влезе со негатива од 29:30, но Македонија ЃП со два брзи гола стигна до 29:32, а домаќините до крајот успеаја само да го намалат резултатот на 31:32.
Ова е четврти пораз сезонава за тимот од Неготино, по поразите од Младост во Богданци и Текстилец во Штип, како и од конкурентот Мулти Есенс, а сега и на домашен терен од Македонија Ѓорче Петров.
Вардар моментално е на четвртата позиција со 16 бодови, осум помалку од непоразениот лидер Младост Богданци. Ова практично ги намалува шансите за директен влез во Суперлигата, па тимот на Игор Котевски ќе мора да се насочи кон борба за второто место, кое носи бараж за елитата.
Кај Вардар Неготино најефикасен беше Мице Шилегов со 7 гола, а Петре Пеовски додаде 5. За Македонија ЃП блескаше Бојан Чакалиќ со 10 погодоци, а по 5 постигнаа Владо Ристески и Михаел Тотиќ.
Во друг натпревар од колото, Аеродром со 34:30 ја оправда фаворитската улога против Јехона. Бојан Поповски беше најдобар кај домаќинот со 9 погодоци, а Матеј Марковски постигна 8. Кај гостиварци се истакнаа Адис Салиу со 11 и Бојан Давидоски со 9 гола.
