РК Еурофарм Пелистер соопшти дека тренерот Рубен Гарабаја ја понудил својата оставка, која клубот ја прифатил.
Гарабаја заминува пред истекот на договорот, а клубот наскоро ќе го назначи неговиот наследник.
Со Гарабаја на клупата, Еурофарм Пелистер го освои Суперкупот на Македонија и одигра десет достојни натпревари во Лигата на шампионите за сезоната 2025/26. Неговото заминување доаѓа по натпреварот со Алкалоид, кога тренерот почувствувал дека не добил доволна поддршка, па се одлучил да даде оставка.
„Сакам да потенцирам дека по натпреварот со Алкалоид не почувствував поддршка од амбиентот. Очекував реакција во Загреб, но со оглед на тоа што таа реакција не дојде, се одлучив да ја понудам мојата оставка. Сметам дека мое заминување во овој момент ќе предизвика позитивна реакција кај тимот и ракометарите. Сакам да им се заблагодарам на сите ракометари, со кои имам одличен однос, и да им посакам успех во продолжение на сезоната. Голема благодарност до клубот за ова мое искуство и многу среќа во иднина.“- изјави Гарабаја.
РК Еурофарм Пелистер му се заблагодари на Гарабаја за професионалноста и му посакува успех во понатамошната кариера.
