Во Кавадарци денес се одржа 25-то издание на Меморијалниот турнир „Вуко Каров и Тиквешките легенди“, традиционален спортски настан кој со години претставува симбол на сеќавање, спортски дух и пријателство меѓу клубовите.
Оваа година, покрај домаќинот ГФК Тиквеш 1930 АД, учество земаа и екипите на ГФК Вардар Неготино и ФК Тетекс Тетово. Турнирот се одигра по италијански систем, „секој со секого“ по 45 минути игра.
Во пријателска, но натпреварувачка атмосфера, фудбалерите на Тиквеш покажаа класа и доминација, остварувајќи убедливи победи:
-
ГФК Тиквеш – ГФК Вардар Неготино 5:0
-
ГФК Тиквеш – ФК Тетекс 3:0
-
ГФК Вардар Неготино – ФК Тетекс 2:1
Со две победи и гол-разлика од 8:0, ГФК Тиквеш заслужено го освои првото место, зад себе ги остави ГФК Вардар Неготино на второто и ФК Тетекс Тетово на третото место.
За најдобар голман на турнирот беше прогласен Стефан Тасев од редовите на Тиквеш, додека наградата за најдобар играч му припадна на неговиот соиграч Данаил Тасев.
Организаторите упатија голема благодарност до сите учесници, спортски работници и службени лица кои придонесоа турнирот и оваа година да помине во најдобар ред. Посебна благодарност беше изразена и кон семејството на Вуко Каров, кои и овојпат беа присутни и дадоа посебна емоција на овој меморијален настан.
Со спортски поздрав и традиционалните зборови „Здравје, се гледаме до година“, кавадарчани уште еднаш покажаа дека споменот на Вуко Каров живее преку љубовта кон фудбалот и заедништвото.
