Охрид продолжува да го живее сонот за врвот на македонскиот ракомет. Во дербито против Алкалоид, „гладијаторите“ одиграа маестрално и пред своите навивачи славеа со 28-24. Еден од клучните играчи во нападот беше Тилен Стрмљан, кој постигна 11 погодоци и целосно го диктираше ритамот на тимот на Борис Ројевиќ.
Централниот бек на охриѓани, за Спортска Мрежа, истакна дека победата не била случајност, туку резултат на сериозна подготовка и силна тимска енергија.
„Многу добро се подготвувавме за овој натпревар, од самиот почеток, енергијата и мотивацијата беа на највисоко ниво, и кога сме цврсти и играме со енергија пред ваква публика… сè е полесно, така што почетокот беше извонреден, првото полувреме шест разлика што е врвно, примени единаесет голови во второто, за жал не знам зошто… направивме две-три грешки, но потоа некако се извлековме со одбраната, па потоа и ни тргна во нападот… и на крај ете – заслужена победа.” – изјави Стрмљан.
Со вакви изданија и концентрација во клучните моменти, охридскиот тим сè повеќе потсетува на зрел колектив кој знае како да победи и кога не оди сè според планот. Победата над Алкалоид е уште еден чекор напред кон амбициите за врвот и најдобра увертира пред европскиот дуел со Слога Добој.
