Ракометарите на Младост од Богданци ја продолжуваат импресивната сезона во Првата ракометна лига, каде што се единствената непоразена екипа со максимални осум победи од осум натпревари. Во сабота, Младост ќе го одигра дербито против директниот конкурент Драчево Јуниор, натпревар кој може да биде клучен чекор кон големата цел — враќање во елитата.
За Спортска Мрежа, своите размислувања пред дербито ги сподели голманот на Младост, Кристијан Костадиновски.
„Секој натпревар го сфаќаме сериозно и со максимален пристап, исто ќе биде и во сабота на натпреварот со Драчево Јуниор. Предноста е на наша страна затоа што играме пред своите навивачи, но како и секој натпревар така и овој со максимален пристап да се радуваме на двата бода.“
Костадиновски истакна дека тимот добро го анализирал противникот и очекува тешко, но возбудливо дерби.
„Да, го анализиравме противникот, имаат добри играчи, дел од нив имаат исто така настапи во Суперлигата, нема да е лесно, но мислам дека со добра игра во одбраната и добра транзиција ќе се радуваме на уште една победа.“
Младост во текот на сезоната има огромна поддршка од својата публика, а Костадиновски ја очекува истата атмосфера и во сабота.
„Досега имаме огромна поддршка дури и на гостинските натпревари, атмосферата е одлична на домашните натпревари и очекувам уште поголема поддршка во сабота и заедно да се радуваме на уште една победа.“
Младост од Богданци моментално има 16 бодови и ќе се обиде да ја продолжи својата победничка низа пред домашната публика.
