Македонските каратисти блеснаа на стартот од Балканското првенство за кадети, јуниори и У-21, кое викендов се одржува во Риека, Хрватска. Веќе по првиот натпреварувачки ден, Македонија се закити со три медали – две сребрени и една бронзена.
Сребрени медали освоија Нуредин Дервиши и Ера Коџа, додека Недим Шаќири се искачи на подиумот со бронзен медал.
Недим Шаќири во категоријата У-21, -60 кг со борбен и мотивиран настап стигна до заслуженото трето место и донесе нов успех за македонското карате.
Нашата Ера Коџа пак, имаше блескав настап во дисциплината Кумите У-21, -68 кг, каде што се пласираше во финалето и со тоа обезбеди сребрен медал. Во исклучително силна конкуренција, таа демонстрираше врвна техника, голема посветеност и борбен дух.
Овие успеси се потврда за квалитетот и континуитетот на младите македонски каратисти, кои достојно ја претставуваат државата на меѓународната сцена.
