Возбудливо шесто коло во македонската кошаркарска Суперлига, кое донесе нови интересни резултати, потврди на фаворитите, но и едно големо изненадување.
Екипата на МКК Куманово по поразот во дербито со МЗТ се врати на победничките патеки со убедлив триумф на гостувањето кај Гостивар (65-79). Избраниците на Марин Докузовски одиграа зрела и контролирана партија во текот на сите 40 минути, а победата ја донесоа со одлично второ полувреме.
Максим Митевски повторно беше прво име со 20 поени и шест скока, а покрај него блесна и искусниот Урош Луковиќ со дабл-дабл ефект од 17 поени и 15 скока. Кај Гостивар најдобри беа Младеновиќ со 16 и Карахоџиќ со 15 поени. Со овој триумф Куманово го задржа чекорот со врвот и остана на второто место со скор 5-1.
Македонскиот вицешампион ТФТ Скопје ја продолжи победничката серија и остана единствено непоразен екипа во лигата. Избраниците на Боро Смилковски славеа против новајлијата Ангели со 67-57 во натпревар кој не донесе премногу убавина, но беше важен за бодовите.
Иако играа без дел од стартерите, ТФТ покажа карактер и рутина. Џастин Гордон повторно беше лидер со 21 поен, додека Зафиров и Иванов додадоа по 12 и 10. Кај гостите одлични беа Ибраими и Балов со вкупно 40 од 57-те поени на својот тим.
Најголемото изненадување на колото го приреди младата екипа на Феникс 2010, која го совлада Тиквеш во Кавадарци со 82-86. Иако кавадарчани имаа висока предност од +16 по серијата (19-0) во втората четвртина, тимот на тренерот Денис Дервишевиќ се врати со неверојатен пресврт.
Во третиот период Феникс реализираше 34 поени, направи целосен обрт и го задржа водството до крајот. Најефикасни беа Дисон и Рахама со по 23 поени, Ниах додаде 19, а Златевски 10. Кај Тиквеш, Андерсон постигна 19 поени, а Бошалевски 18.
