Во рамки на 10. коло од Суперлигата, ракометарите на РК Бутел Скопје во среда ќе го пречекаат амбициозниот состав на ГРК Охрид во салата „Антон Димитров“ со почеток во 18:00 часот.
Скопскиот клуб е решен да се прикаже во најдобро светло пред своите навивачи и да им се спротивстави на охриѓани, кои сезонава имаат високи цели и сериозно засилен состав.
Тренерот на Бутел, Горан Кузманоски, за Спортска Мрежа, го најави мечот против амбициозниот Охрид. Тој, во пресрет на натпреварот ја истакна почитта кон противникот, но и мотивот на својата екипа:
„Во последните години, Охрид доста вложува и се сериозна екипа. Нивните амбиции се да се борат за титула и Куп, па тоа нам ќе ни претставува мотив плус да одиграме на високо ниво против Охрид.“ – изјави Кузманоски.
Бутелци очекуваат интересен и неизвесен натпревар, во кој домашниот терен би можел да биде нивна дополнителна предност.
