По осум кола во Втората лига дојде до тренерска промена во Вардарски, откако Васе Беќаров си поднесе оставка, а на негово место доаѓа искусниот Ѓоре Јовановски, кој ќе го води повратникот во продолжението од Втората лига.
68-годишниот искусен стратег ќе има за цел со Вардарски да избори опстанок во Втората лига, а неговото деби на клупата на второлигашот од Богданци ќе биде в сабота во рамки на деветтото коло против Охрид на „Билјанини Извори“.
Вардарски по осум кола е единствениот второлигаш кој нема триумф, а има скор од две ремија и шест порази и со два бодови е на дното од табелата.
Јовановски како шеф на стручен штаб имаше работено со Беласица, Шкендија, Брегалница, Металург, Милано, Работнички, Вардар, Кожуф од Гевгелија, Јовановски работеше и во турскиот прволигаш Самсунспор, како и во бугарски шампион ЦСКА Софија, а беше и во Саудиска Арабија.
Како што најави и Спортска Мрежа во самата анализа пред почетокот на осмото коло конкретно за мечот меѓу Вардарски и Беласица, очекувавме некои промени во зависност од резултатот.
Вардарски после 27 години се врати во Втората лига, но и натаму чека на второлигашка радост.
