Со натпреварот меѓу Вардар и Астибо вечерва беше отворено седмото коло од женската ракометна Суперлига. На дуелот одигран во Скопје, вардарки стигнаа до убедлива победа од 38:26, а за гостинките од Штип, ниту фантастичната партија на искусната Марија Анчева со 12 погодоци не беше доволна за изненадување.
Домаќинот одлично го отвори мечот и уште во првите минути го наметна својот ритам. Вардар доминираше во сите сегменти на играта и во 16. минута веќе имаше висока предност од 12:2, што практично ја одреди судбината на натпреварот.
Астибо се обидуваше да воспостави резултатски баланс, но тешко успеваше да го следи темпото на фаворитот. Во второто полувреме Вардар играше на рутина, контролирајќи го текот на мечот и одржувајќи стабилна предност до последниот свиреж на судиите.
Кај домаќините најпрецизна беше Леона Миленкоска со шест погодоци, а веднаш зад неа беше Ивана Кимовска со пет реализации. На спротивната страна, Анчева повторно ја потврди својата класа, но не доби доволна поддршка од соиграчките за да се закани на резултатот.
Во следното коло, штипскиот тим ќе гостува кај Спартак, каде ќе ја бара шансата за враќање на победничките патеки. Вардар, пак, го очекува тежок предизвик на домашен терен против актуелниот првак Металург Автокоманда.
