Историскиот настап на Наковски Волеј во европските натпреварувања не донесе позитивен резултат, откако македонскиот претставник загуби со 3:0 (25:13, 25:9, 25:10) на гостувањето кај чешката Острава во првиот натпревар од квалификациите за ЦЕВ Челинџ Купот.
Иако дебитантките од Струмица влегоа мотивирано и без притисок, искусниот чешки тим брзо ја наметна својата доминација и не дозволи неизвесност во ниту еден сет. Острава ја користеше својата физичка надмоќ и стабилен прием, додека струмичанки тешко доаѓаа до поени од втора топка.
Најефикасна во редовите на Наковски Волеј беше репрезентативката Лиља Ковачевиќ со 7 поени, а по 4 реализираа Мила Долдурова, Ивана Милева и Ива Стојковска. И покрај поразот, тренерот Александар Митев може да биде задоволен од борбеноста и искуството што ќе му помогне на младиот тим во понатамошниот развој.
Реваншот е закажан за 5 ноември во салата „Парк“ во Струмица, каде македонскиот состав ќе се обиде да остави подобар впечаток пред својата публика и да го искористи домашниот терен за да покаже дека заслужено е дел од европската одбојкарска сцена.
