Возбудлив натпревар со четири гола и драматичен расплет се одигра во Гостивар, каде Арсими и Работнички ги поделија бодовите одигрувајќи 2-2 во рамки на 11. коло од Првата македонска фудбалска лига. Иако гостите од Скопје на полувремето водеа со 0-2, домаќините повторно покажаа карактер и успеаја да се спасат од пораз во завршницата на мечот.
Работнички го отвори натпреварот подобро и создаде неколку прилики уште во првиот дел, наградувајќи го тоа со два погодоци во само една минута. Најпрво, Демир Имери со прецизен удар од работ на шеснаесетникот ја затресе мрежата на домаќините, а само по неколку секунди несреќно интервенираше Дрљевиќ, кој ја испрати топката во сопствената мрежа за 0-2.
Арсими по паузата тргна многу поофанзивно, предводен од своите најискусни играчи. Прво, Башким Велија со вистински еврогол од далечина намали на 1-2, враќајќи ја неизвесноста во натпреварот. До крајот домашните фудбалери не се предаваа и во 84. минута дојдоа до израмнување преку резервистот Албан Таипи, кој најдобро се снајде во мешаницата пред голот на Работнички. По прегледување на ситуацијата со ВАР системот, погодокот беше признат на радост на публиката во Гостивар.
Во последните минути од натпреварот и двете екипи имаа шанси за цел плен, но резултатот остана непроменет. Работнички може да жали, бидејќи имаше сигурна предност, но не успеа да ја задржи.
По ова реми, Арсими го задржа осмото место на табелата со 12 освоени бодови, додека Работнички останува десетти со вкупно седум бодови. Во следното коло, тимот од Чегране ќе го пречека Башкими, додека скопските „романтичари“ ќе имаат нов предизвик против Тиквеш.
