Ракометниот клуб Струга соопшти дека нивниот играч Филип Пајкоски во текот на вчерашниот ден бил подложен на успешна операција на рамото, по што ќе следи период на рехабилитација и опоравување.
Од клубот преку соопштение истакнаа дека му посакуваат брзо опоравување на Пајкоски и брзо враќање на ракометните терени.
„Поради повреда на рамо, во текот на вчерашниот ден успешно беше опериран нашиот ракометар Филип Пајкоски. По што следи процес на рехабилитација. Филип ти посакуваме брзо опоравување и да се вратиш посилен. Голема благодарност до целиот тим кој беше задолжен за неговата операција, посебно до Др. Огнен Шешоски и Др. Александар Стевоски,“ стои во соопштението на клубот.
Пајкоски беше еден од стандардните играчи во составот на стружани на почетокот од сезоната, па неговото отсуство ќе претставува значаен удар за тимот на тренерот на Струга.
По девет одиграни кола, стружани се наоѓаат на 10. место на табелата со четири освоени бодови, при биланс од две победи и седум порази. По завршувањето на ЕХФ неделата, Струга ќе се соочи со тешко гостување кај фаворитот Алкалоид во Автокоманда.
