Познат е распоредот и изгледот на новата сезона во Втората футсал лига, која оваа година ќе брои 11 екипи, што е за две помалку во однос на ланската сезона кога настапуваа 13 клуба. Новитет во сезоната е дебитантот Фудбал Старс Ауто Велт од Кочани, со што футсалот по неколку години повторно се враќа во овој град.
Во новата сезона 2025/2026 ќе се натпреваруваат ланските прволигаши Железарец и Црна Река, како и екипите Карадаку, Каршиака, Конзули, Кратово, Овче Поле, СЕЕ Университи, ССК Скопје и Партизан Југ од Брвеница. Новиот член од Кочани ќе биде единствениот дебитант во ова издание на лигата.
Првото коло ветува возбудливи натпревари ширум Македонија. Во Свети Николе ќе се соочат Овче Поле и Конзули, во Кавадарци Црна Река ќе биде домаќин на Каршиака, а во Тетово ќе се одигра натпреварот меѓу СЕЕ Университи и Кратово. Во Брвеница силите ќе ги одмерат Партизан Југ и Карадаку, додека пак Железарец ќе го пречека дебитантот Фудбал Старс Ауто Велт. Во ова коло слободна ќе биде екипата на ССК Скопје.
Со ова, Втората лига влегува во ново поглавје исполнето со свежи предизвици, нови амбиции и желба за напредок. Особено внимание привлекува враќањето на футсалот во Кочани, каде што љубителите на малиот фудбал повторно ќе имаат можност да уживаат во натпревари на домашен терен.
Во однос на минатата сезона, во лигата нема да настапуваат Победа од Прилеп, Кораб од Дебар и Енхалон од Струга, кои не ја пријавија својата екипа за оваа натпреварувачка година.
Новата сезона во Втората футсал лига ветува интересна борба за врвот и промоција во елитата, со бројни млади таленти и традиционални футсал центри кои ќе се обидат да го покажат својот потенцијал на теренот.
Како што е познато првите две екипи обезбедуваат директен влез во Првата футсал лига за сезона 2026/2027.
