Еурофарм Пелистер славеше во „братскиот“ дуел против Еурофарм Пелистер 2 со резултат 34-27, во натпреварот од осмото коло на ракометната Суперлига. Актуелниот шампион потешко го проби отпорот на младиот состав, но во вториот дел ги потврди своите амбиции и стигна до нови бодови.
По израмнетото прво полувреме, кое заврши 18-18, поискусниот тим на Рубен Гарабаја ја презеде иницијативата. На средината од вториот дел направија серија од четири голови и се одлепија на 27-23, што беше доволно за мирен финиш.
Иако настапи без неколку стандардни играчи, меѓу кои Митревски, Пешевски и Тајник, шампионот покажа стабилност и колективна сила. Шанса на голот доби младиот Мацанковски, кој се претстави во добро светло со десет одбрани. Најефикасен стрелец беше Рудолф Хакбарт со седум погодоци, а зад него се најдоа Кузмановски, Петар Атанасијевиќ и Хаџиќ со по пет.
Во редовите на Еурофарм Пелистер 2, најрасположен беше Бојан Гичев со седум гола, а добар настап имаше и голманот Младенов со 11 интервенции. Младиот состав, и покрај поразот, остави позитивен впечаток со борбената игра и мотивираниот настап.
Со овој триумф, Еурофарм Пелистер се искачи на втората позиција на табелата со 13 бодови, додека вториот битолски тим останува во долниот дел, продолжувајќи ја борбата за место во плеј-офот. Во следното коло, шампионот ќе го пречека Радовиш, а Еурофарм Пелистер 2 ќе гостува кај Алкалоид.
