Тања Стојановска успешно го заврши курсот и се здоби со тренерска лиценца ИТФ ниво 3, кое претставува највисокото тренерско ниво во тенисот што го издава Светската тениска федерација (ITF).
Стојановска во изминатиот период активно работеше на стекнување на ова звање, кое опфаќаше два дела – теоретски и практичен. Теоретскиот дел се реализираше онлајн, додека практичниот дел се одржа во Валенсија, каде што учесниците работеа со играчи од највисок ранг.
Курсот вклучуваше теми како планирање, биомеханика, тактика, физичка и психолошка подготовка, како и современи методи на тренинг.
Со ова, Стојановска стана петтиот тренер од Македонија со највисоко ИТФ ниво, по Чедомир Јовановски, Предраг Русевски, Димитар Лабудовиќ и Горан Шевченко, а воедно е и првата жена тренер во земјата што ја поседува оваа лиценца.
“Најпрво би сакала искрено да им се заблагодарам на сите кои беа дел од реализацијата на овој курс. Поддршката, насоките и охрабрувањето од менторите, организаторите и останатите учесници одиграа клучна улога во тоа ова искуство да биде значајно и успешно за мене. Размената на идеи и искуства со луѓе посветени на спортот ми помогна да стекнам нови сознанија и да го проширам моето разбирање за тоа како учиме, подучуваме и напредуваме во тенисот. Овој курс имаше длабоко влијание врз мене, и професионално и лично. Се чувствувам како поефективен тренер со нови цели и визија за иднината,” – изјави Стојановска.
Проектот е реализиран со поддршка од Интернационалната олимписка солидарност, преку Македонскиот олимписки комитет и ИТФ Светската тениска федерација, во соработка со Тениската федерација на Македонија.
