Македонскиот одбојкарски репрезентативец Лука Костиќ ќе ја започне новата сезона со нов интернационален предизвик, откако потпиша едногодишен договор со кипарскиот прволигаш Анагениси Дериниа.
Костиќ е четвртиот интернационалец во редовите на Дериниа и своето деби во новиот клуб ќе го има веќе викендов, кога започнува кипарскиот шампионат.
„Со Дериниа се договоривме на едногодишна соработка. Веќе одработив неколку тренинзи со екипата и одлично сум прифатен од соиграчите. Владее убава атмосфера и енергија за работа. Екипата е комбинација од млади и искусни играчи. Официјално сезоната стартува викендов и се надевам дека ќе биде успешна,“ изјави Костиќ.
Кипарскиот клуб го претстави македонскиот примач како „искусен играч кој со својата сила и желба за победа ќе донесе додадена вредност во тимот“.
Костиќ започнува ново поглавје во својата интернационална кариера, по настапите за Босна (БиХ) минатата сезона, како и за Рибница Краљево (Србија), Марек Дупница (Бугарија) и Будуќност Подгорица (Црна Гора). Потекнува од скопски Вардар, а во македонското првенство настапувал и за Џио Струмица и ГОК Борец Велес.
Летово, Костиќ имаше активна репрезентативна сезона, настапувајќи во Европската златна лига и квалификациите за Европското првенство 2026, на кое Македонија обезбеди четврто последователно учество на континенталниот собир.
