Пред почетокот на денешниот натпревар од 8. коло на Втората лига против Беласица, Осогово од Кочани организираше мала свеченост во чест на двајца свои верни играчи – Стојанче Тренчев и Ѓорѓи Јованоски, кои неодамна стигнаа до бројката од 100 официјални настапи во жолто-синиот дрес.
Двајцата фудбалери добија врамени фотографии со бројот 100 и пригодни подароци од управата на клубот, како симбол на благодарност за нивната лојалност и придонес во тимот.
Тренчев, 21-годишниот фудбалер кој целата своја кариера ја поминува во Осогово, и голманот Јованоски, кој го има неговиот втор престој во Кочани и го брани голот на „жетварите“, се дел од најстандардните фудбалери во кочанскиот состав.
Со ова признание, Осогово уште еднаш покажа дека ги цени фудбалерите кои со срце и посветеност ги бранат боите на клубот, додека атмосферата пред дербито со Беласица беше исполнета со емоции и аплаузи од навивачите на стадионот во Кочани.
