Фудбалскиот клуб Пелистер официјално го назначи Милан Стојановски за нов шеф на стручниот штаб, откако клубот се раздели со досегашниот стратег Димитар Капинковски. Оваа промена доаѓа во момент кога „зелените“ се обидуваат да ја подобрат формата и резултатите во текот на сезоната во Првата македонска фудбалска лига.
52 годишниот Стојановски е поранешен македонски репрезентативец со богата играчка кариера зад себе, за А репрезентацијата на Македонија настапил 26 пати и постигнал еден погодок. Како фудбалер важеше за еден од најсигурните дефанзивци на своето време, познат по својата мирнотија и лидерски квалитети на теренот.
Интересен факт е што Милан Стојановски е роден и израснат во Србија, но има македонски корени – неговиот татко потекнува од охридската Речица, што дополнително го поврзува со земјата чиј дрес со гордост го носеше во текот на својата кариера.
Како тренер, Стојановски својата кариера ја градел главно во Србија, каде што предводеше неколку клубови, меѓу кои и ИМТ Белград и Телеоптик, клуб познат по тоа што произведува таленти и има блиска врска со белградски Партизан. Ова ќе биде негово прво ангажирање во Македонија, па македонската јавност со голем интерес ќе следи како ќе се снајде на битолската клупа.
Од клубот истакнуваат дека очекуваат новата енергија и искуството на Стојановски да донесат позитивни промени во тимот, а играчите веќе го започнаа процесот на прилагодување на новиот систем на работа.
ФК Пелистер со оваа промена ја отвора новата страница во сезоната, со цел да ги стабилизира резултатите и да се врати на победите.
