Фудбалската федерација на Македонија (ФФМ) објави важно известување до сите навивачи кои купиле ваучери за билет за претстојниот натпревар помеѓу Белгија и Македонија, што ќе се одигра на 10 октомври во Гент.
Од ФФМ информираат дека на сите навивачи веќе им е испратен e-mail од Белгиската фудбалска федерација (RBFA) со линк преку кој треба да се направи најава (log in) и да се активираат билетите.
Според објавеното, за секој поединечен билет мора да се внесе име и презиме на лицето кое ќе присуствува на натпреварот, бидејќи без тоа влез на стадионот нема да биде возможен.
ФФМ апелира до навивачите да ги проверат своите е-поштенски сандачиња, вклучително и Spam или Promotions папките, и навреме да ја завршат активацијата на билетите, бидејќи и понатаму има релативно голем број неактивирани влезници.
Од федерацијата дополнително потсетуваат навивачите да го поддржат националниот тим фер и спортски, во духот на спортот и македонската традиција.
