Шкендија Арачиново славеше со минимални 0-1 на гостувањето кај Беласица во дербито одиграно под рефлектори во Струмица, со што беше затворено седмото коло од Втората македонска фудбалска лига.
Стрелец на единствениот погодок беше Еркан Шаип, кој во самиот финиш на натпреварот ја затресе мрежата и ги донесе трите бодови за својот тим. Со овој триумф, составот на Љупчо Марковски – Калц се израмни на врвот на табелата со штипска Брегалница, двете екипи сега имаат по седумнаесет бодови, што најавува повеќе од возбудлива сезона во Втората лига.
Во следното коло, Беласица ќе гостува во Кочани кај Осогово, додека Шкендија Арачиново ќе има ново гостување – овој пат во Тетово против Тетекс.
