Денес беа одиграни седум од осумте натпревари од седмото коло во Втората македонска фудбалска лига. Единствената средба без голови се одигра на стадионот „Билјанини Извори“, каде во дербито на колото Охрид и Брегалница Штип ремизираа 0-0 и ги поделија бодовите.
Осогово дојде до минимален, но вреден триумф од 0-1 на гостувањето кај Слога Виница, со голот на Драган Паунов во второто полувреме, кој влезе од клупата и донесе три бода за кочанчани. Големо Коњари ја запиша својата прва сезонска победа, совладувајќи го тимот на Кожуф од Гевгелија со минимални 1-0, благодарние на автоголот на Дарко Стојанов.
Во Каменица, домаќинот Саса пропушти предност од два гола и на крај мораше да се задоволи со реми 3-3 против Тетекс, во возбудлив меч исполнет со пресврти. Бојан Иванов во 16. минута погоди за водство на „рударите“, а пак Тони Мичковски во 75. минута зголеми на 2:0. Сепак, во 82. минута Азис Јамини намали на 2:1 и ја врати неизвеноста.
Во 87. минута Мичковски со втор гол зголеми на 3:1, но потоа следуваше „ладен туш“ за домаќинот откако Меритон Салији во 89. минута намали на 3:2, а во 94. минута новото засилување Петар Обадиќ погоди за конечни 3:3 и голем бод за „штофарите“ од Тетово.
Детонит Плачковица пак, на свој терен славеше со 3-1 против Победа од Прилеп, благодарение на двата гола на Сашко Дуков и еден на Александар Смилков. За прилепчани погоди Филип Димоски.
Во Ресен, Новаци одиграа убедливо и со 0-3 ја совладаа Преспа, освојувајќи значајни бодови за зацврстување во средината од табелата. Андреј Сиљаноски по пет минути обезбеди предност за Новаци. Во 90. минута гостинот доби пенал, Стефан Јовановски биеше, но голманот на домашниот тим Христијан Сркески го одбрани ударот, а одбиената топка Јовановски ја смести во мрежата за 2:0, а веќе во 93. минута Мартин Андоновски ги постави конечните 3:0.
Скопје на домашен терен со убедливи 4-1 го декласираше Вардар Неготино, триумф до кој „пиратите“ стигнаа без многу мака. Најдобриот стрелец Виктор Ангелов погоди во 7. минута за водство на Скопје, а Мердиан Рамадани постигна гол за 2:0 на полувреме. Во вториот дел Скопје преку Горјан Цветков и Армир Иса дојде до 4:0, а конечниот резултат за ублажување на поразот од 4:1 го постави Ристе Лембовски.
Колото ќе се заокружи утревечер со дербито под рефлектори помеѓу Беласица и Шкендија Арачиново – дуел кој може да донесе промена на врвот на табелата. Победа на струмичани ќе ги искачи на лидерската позиција, додека во секој друг исход Брегалница ќе остане на врвот со ист број бодови.
