Со два натпревари започна 4. коло во Првата ракометна лига, а вечерта донесе убедливи победи за Вардар Неготино и Мулти Есенс.
Во Неготино, домашниот Вардар не остави простор за изненадување и со моќна игра ja совлада Јехона со 39:25. Крилата беа главно оружје на црвено-црните – Мице Шилегов постигна 11 гола, а Христи Бикоски заврши со 10 погодоци. Својата вечер ја заокружи и Ѓорѓи Орешков со седум реализации. Гостите од Гостивар најмногу се потпираа на искусниот Адис Салиу (7) и Бојан Давидоски (6), но тоа не беше доволно за рамноправна борба. Вардарци уште на полувреме водеа со 18:11 и до крајот рутински ја зголемуваа предноста.
Паралелно, во Скопје, Мулти Есенс ја искористи домашната предност и го надигра Аеродром со 34:27. Иако гостите добро се држеа во воведните минути, домаќинот брзо наметна темпо и на одмор замина со високи 19:11. Во второто полувреме разликата само се продлабочуваше, а најрасположен беше Бобан Поповски со 10 гола, вклучувајќи и три прецизни шута од линијата за седум метри. За Аеродром, најдобар стрелец беше Благој Христовски со шест погодоци.
Програмата продолжува утре со три натпревари: Партизан – Текстилец, Преспа – Шампион и Овче Поле – Кичево. Колото ќе се затвори во недела кога Македонија ЃП ќе ја пречека Младост од Богданци.
