Нашата најдобра таеквондистка, Милијана Рељиќ, се закити со бронзен медал на силниот Г1 турнир што викендов се одржа во Полска. Успехот е дополнет и со признание за Мери Ацевска, која беше прогласена за најдобар судија на турнирот.
Рељиќ турнирот го отвори одлично, совладувајќи ја Аида Митровиќ од Австрија со убедливи 2-0 во рунди. Во четвртфиналето ја очекуваше вистинска драма против Хрватката Хелена Кичема. Македонската таеквондистка славеше со 2-1 во рунди, а во решавачката третa рунда победи со тесни 7:6. Тоа беше петти меѓусебен дуел на двете натпреварувачки, а Рељиќ води со скор од 4-1.
Во полуфиналето, сепак, Чехинката Петра Столбова беше посилна и со 2-0 во рунди ја запре Рељиќ на патот кон финалето.
Со ова бронзен медал, Мила освои нови 3,60 поени во олимписката ранг-листа и го продолжува својот поход кон остварување на големата цел – учество на Лос Анџелес 2028.
