Овој викенд ќе се одиграат натпреварите од 5. коло од Третата македонска фудбалска лига – Запад, веќе се познати и судиите кои ќе ја делат правдата на сите натпревари, за што објави Спортска Мрежа.
Меѓутоа, поранешниот прволигаш Напредок од Кичево, преку соопштение реагира за делегираниот судија кој треба да им суди овој викенд на мечот против Речица на гостински терен.
- ЦЕЛОСНОТО СООПШТЕНИЕ НА ФК НАПРЕДОК:
„ФК Напредок има забелешка дека повторно е делегиран судијата Пларент Салихи кој на натпреварот со Ренова судеше на штета на ФК Напредок и ни додели осум жолт и еден црвен картон, исто така и претходната сезона оди против ФК Напредок. Се прашуваме кој и зошто игра вакви валкани игри и на кому му смета ФК Напредок. Доколку повторно се случи неспортско не фудбалско судење, тендециозно со допис ќе бараме вакво лице да не му суди на еден од најстарите и најреспектираните клубови во македонскиот фудбал“, се вели во соопштението на ФК Напредок.
Напредок има три од три на стартот од сезоната и максимален учинок, додека пак Речица има четири порази од толку натпревари и без ниту еден освоен бод е на дното од табелата.
Натпреварот меѓу Речица и Напредок се игра утре со почеток од 15 часот.
