Во недела ќе се испише историја во македонскиот фудбал, откако за првпат во сениорски фудбал сите официјални лица ќе бидат жени.
Во рамки на 5. коло од Третата македонска фудбалска лига – Исток на мечот меѓу фаворитот Слога Виница и новиот третолигаш Светлост од Зрновци, за главен судија е делегирана Виолета Јанчева од Гевгелија, прв помошен судија ќе биде Снежана Илиевска од Македонска Каменица, а пак Александра Спасова од Свети Николе ќе биде втор помошен судија.
За делегат на натпреварот кој се игра на Градскиот стадион во Виница е делегирана Гордана Кочева од Валандово, а пак контролор на натпреварот ќе биде Јордан Гицов од Кочани.
Ова е историски момент за македонскиот сениорски фудбал, со делегирањето на сите официјални лица да бидат жени.
Што се однесува до останатите натпревари и делегираните судии, Доне Ристовски од Гевгелија ќе ја дели правдата во Свети Николе каде ќе се соочат Овче Поле и Хоризонт Турново во дербито на петтата рунда од Трета лига – Исток, дуел на второпласираниот и третопласираниот тим.
Правдата во Берово каде ќе играат Малеш и Карбинци ќе ја дели Тоше Џамов од Кочани, во Струмица ќе суди Здравко Костовски каде играат Тиверија и Дојранско Езеро, а пак главен судија во Делчево каде ќе играат Брегалница и Ударник ќе биде Спире Арсов од Кочани.
Сите натпреварит се играат в недела од 14 часот.
