Фудбалската федерација на Македонија донесе историска одлука со која се укинува котизацијата за настап во Втора македонска фудбалска лига.
За првпат по речиси 15 години, клубовите од Втората лига немаат обврска да плаќаат котизација за учество во првенството. Одлуката е донесена по иницијатива на претседателот на ФФМ, Масар Омерагиќ, и претставува значаен чекор кон создавање подобри услови за работа, финансиско олеснување и унапредување на натпреварувачката конкуренција.
Со оваа мерка, клубовите се ослободени од вкупна сума од 128.000 евра за една натпреварувачка сезона, што директно ја зајакнува нивната финансиска стабилност.
Дополнително, со оглед на тоа што ФК Беса 1976 нема да учествува во сезоната 2025/26, ФФМ одлучи испразнетото место да го пополни ФК Преспа. На овој начин се обезбедува интегритетот на лигата, континуитетот на натпреварувањето и фер-плеј принципите во Втората македонска фудбалска лига.
