Хусеин Демири, еден од највпечатливите фудбалери на Башкими во минатата сезона, ја продолжува својата кариера надвор од Македонија. Искусниот скопски напаѓач потпиша договор со косовскиот второлигаш Вуштри, клуб кој ќе биде негов четврти ангажман во оваа земја.
Демири блескаше во дресот на Башкими, давајќи значаен придонес за пласманот на кумановскиот клуб во Првата македонска лига. Токму таа форма му ја отвори вратата кон нова интернационална авантура, а трансферот беше реализиран преку менаџерот Шендрит Заими и неговата фудбалска агенција, која сè поактивно се наметнува во регионот.
29-годишниот Демири претходно во Косово настапуваше за Феризај, Дуќагини и Призрен, а на меѓународната сцена играше и во Финска за тимот на Кеми. Во домашниот фудбал, тој го носеше дресот на неколку македонски екипи – Работнички, Македонија ЃП, Шкупи, Влазрими, Тетекс и Охрид.
Со искуството што го поседува, Демири се очекува да биде големо засилување за Вуштри и да донесе напаѓачка острина во битката за повисок пласман во косовската Втора лига.
