Екипата на Детонит Плачковица за новата сезона во Втората македонска фудбалска лига, продолжува активно да го комплетира ростерот. Клубот од Радовиш денеска претстави уште две нови засилувања.
Станува збор за Мартин Мисердовски и Јасин Казимоски.
22-годишниот Мисердовски е централен бек кој доаѓа од Работнички, тој потекнува од Њу Старс, а настапуваше и за екс второлигашот Кадино и Каменица Саса.
24-годишниот Казимоски во Радовиш пристигна од прилепска Победа, стружанецот е дефанзивен играч од средниот ред. Покрај за Победа има настапувано и за Воска Спорт, Новаци, Караорман кој е негов матичен клуб, Велешта, Охрид, кичевски Влазерими, за поранешниот прволигаш Младост Царев Двор од Ресен, Тетекс и Ренова.
Новите засилувања веќе се приклучија на Детонит Плачковица и работат со искусниот стратег Горан Здравков.
Радовишани градат млада и квалитетна екипа, со што повеќе од сигурно е дека “жолто-сините” ќе конкурираат за висок пласман.
Претходно радовишкиот второлигаш ги промовираше искусниот Сашко Дуков, Филип Ѓорѓиевски, повратникот Стефан Бабунски и Тино Спасиќ.
Веќе утре Детонит Плачковица ќе го одигра првиот контролен натпревар со екипата на Беласица во Радовиш.
