Ракометниот клуб Прилеп ги започна подготовките за новата сезона во машката Суперлига, под водство на новиот шеф на стручниот штаб, Наум Танески. На првиот собир, кој се одржа во спортската сала на СОУ „Ристе Ристески – Ричко“, беа претставени и новите засилувања, со што прилепчани јасно ја испратија пораката дека имаат високи цели во новиот шампионат.
Во составот на Прилеп пристигнаа тројца ракометари со интернационално искуство. Грузискиот десен бек Сандро Дарсанија доаѓа од Португалија, додека црногорскиот репрезентативец Божидар Лековиќ настапуваше за тим од Азербејџан. Третото засилување е повратникот во македонскиот ракомет, Димитар Димитриоски, кој последно играше за шпански Ваљадолид.
Раководството на клубот успеа да ги задржи и неколку клучни имиња од ланскиот ростер – нови договори потпишаа Владо Кастратовиќ, Иван Ангелески, Денис Шабановиќ, Александар Тренчевски, Марио Столески и Томислав Квастек.
Од друга страна, со екипата се разделија тројца ракометари – Никола Цветаноски, Левани Имнадзе и Ангелче Органџиев.
Прилеп ќе ја темпира формата преку серија контролни натпревари, вклучително и настап на традиционалниот Меѓународен турнир „Миле Нешкоски“ кој ќе се одржи во Прилеп од 21 до 24 август. Новата сезона во Суперлигата официјално започнува на 6 септември, а Прилеп ќе ја отвори на домашен терен против Еурофарм Пелистер 2.
