Македонските претставници Силекс и Работнички го завршија својот настап во Европа уште во првото квалификациско коло од Конференциската лига на УЕФА.
Кратовчани одиграа борбен реванш против црногорскиот Дечиќ на теренот „Петар Милошевски“ и славеа со 2-1, но победата се покажа како пирова.
Поради поразот од 2-0 на првиот дуел во Тузи, тимот на Силекс не успеа да се избори за пласман во следната рунда. Иако имаа теренска иницијатива и го контролираа натпреварот, фудбалерите на Силекс не успеаја да постигнат доволно голови за целосен пресврт.
По само три минути Стриковиќ го отвори резултатот за водство на гостинот од Црна Гора, а во 28. минута Алиќ погоди за 1:1 на полувреме.
Во вториот дел Хрвановиќ погоди за конечни 2:1 во 80. минута, а тоа не беше доволно Силекс да го продолжи европското лето.
Работнички, пак, ја заврши својата европска авантура по двомечот со белорускиот Торпедо Белаз. По поразот од 3-0 во првиот натпревар, „романтичарите“ загубија и на реваншот во Скопје со 0-1. Единствениот гол на „Тодор Проески Арена“ го постигна Стивен Алфред во 14. минута со што практично ги уништи сите надежи на дебармаалци за евентуален камбек. Белорускиот тим беше подобар и физички подготвен во двата натпревари и сосема заслужено го обезбеди пласманот во второто квалификациско коло.
Работнички се врати во европските натпреварувања по пауза од седум години, но неговата европска одисеја ова лето траеше кратко.
Сега, фокусот на „романтичарите“ и на тимот од Кратово ќе биде кон подготовките за новата сезона во Првата македонска фудбалска лига, која стартува на 8 август.
