Под светлата на теренот и пред преполни трибини со над 2.000 љубители на фудбалот, екипата на АСП Пак со блескава партија го освои јубилејниот 50-ти турнир „Петровден“ во Мешеишта, совладувајќи ја екипата на Кафе Бар Коко со убедливи 4:0 во големото финале.
Натпреварот го отвори Мишо Ѓорѓиески со погодок во 28. минута, поставувајќи ја основата на триумфот, потоа Нико Пластиноски ја дуплираше предноста во 36. минута, а потоа следуваше фудбалска магија од Мишо Ѓорѓиески, кој постигна хет-трик откако погоди во 37. и 50. минута, заокружувајќи го своето фантастично издание и обезбедувајќи ѝ ја титулата на својата екипа.
Во натпреварот за третото место, Инекс Олгица Хотел и Спа со минимални 1:0 ја совлада екипата на Кафе Бар 9, заокружувајќи го своето успешно учество на турнирот.
🏅 По завршувањето на финалето беа доделени и традиционалните индивидуални признанија:
⚽ Најдобар стрелец: Марио Благојевски (Кафе Бар Коко)
🧤 Најдобар голман: Наим Таулоски (АСП Пак)
✨ Најдобар млад играч – во чест на Јован Николоски: Бојан Јанев (Кафе Бар Коко)
🏅 Најдобар играч: Мишо Ѓорѓиески (АСП Пак)
Финалната вечер беше збогатена и со ревијален натпревар помеѓу генерација 2015/2016 и помлади на ФК Фер Плеј – симболичен момент за иднината на фудбалот.
Со рекорден награден фонд од 500.000 денари, одлична организација и извонредна поддршка од публиката, турнирот „Петровден 2025“ уште еднаш го потврди својот статус како еден од најпрестижните турнири во мал фудбал во Македонија.
Спортска Мрежа со гордост го проследи секој чекор од ова јубилејно издание, и ќе продолжи да ја поддржува оваа традиција која обединува спорт, страст и заедништво!
