Македонската женска одбојкарска репрезентација на 20 јули ги започнува подготовките за престојните квалификациски натпревари за пласман на Европското првенство 2026, а селекторот Стефан Пауновиќ ќе се потпре на веќе проверени имиња кои беа дел од последната акција во Европската Сребрена лига.
Од првичниот поширок список од 24 имиња, стручниот штаб избра 18 одбојкарки, кои ќе бидат дел од подготовките во Маврово, пред тимот да се пресели во Скопје за финалната фаза пред натпреварите.
Квалификациски распоред:
-
3 август (20:00 ч.) – Македонија против Грција (СЦ „Борис Трајковски“, Скопје)
-
9 август – Австрија против Македонија (Виена)
Исклучок од списокот на играчи од Сребрената лига се две коректорки – Мери Бошковска, која поради повреда не настапуваше, и Андротеа Милевска, која беше дел од подготовките, а потоа настапи за младата репрезентација на Балканското првенство во Тирана.
Селекторот Пауновиќ останува доследен во изборот, со цел да ја одржи хемијата и континуитетот, што беше еден од клучните адути на овој состав во последните настапи.
💬 Од ОФМ велат дека интересот за женската репрезентација расте и дека очекуваат полна сала во Скопје на премиерниот квалификациски натпревар со Грција.
