Во неделата попладне, Охрид повторно стана центар на младинскиот ракомет, со почетокот на четвртото издание на кампот „40х20“, кој оваа година се одржува под мотото „Ракометниот терен е мојот свет“. По пристигнувањето, сместувањето и преземањето на спортската опрема, 120 деца – момчиња и девојчиња од четири различни земји – веќе ги имаа првите тренинзи на брегот на Охридското Езеро, започнувајќи ја својата шестдневна спортска авантура.
Кампот се одвива во спортскиот комплекс на хотелот „Десарет“, во периодот од 6 до 11 јули, како дел од поширокиот проект „Ракомет за секое дете“. Овој проект опфаќа и школа за ракомет, како и турнирот Јуниор Куп во мини-ракомет, со цел поттикнување на спортот кај најмладите и создавање здрави навики преку игра и дружење.
Во наредните шест дена, децата на возраст од 7 до 17 години ќе имаат можност да ги унапредат своите ракометни вештини, да учат за спортот и неговите вредности, да се дружат и да создадат нови пријателства – сето тоа во уникатната атмосфера на еден од најубавите градови на Балканот, Охрид.
„По неверојатниот интерес за учество на кампот, ние како организација – чувствувајќи ја одговорноста од довербата што ни беше дадена од децата и родителите од Македонија и странство – подготвени го дочекавме стартот на 4-тото издание на ракометниот камп ‘40х20’. Ќе направиме сè што е во наша моќ да ја оправдаме таа доверба. Концептот останува ист: повозрасните кампери работат на индивидуална надградба со 15 тренери од земјата и странство, додека помладите се воведуваат во основите на ракометот, тимската работа и спортската дисциплина. Кампот има и силен едукативен карактер, со предавања, посебни активности и прошетки низ Охрид,“ – изјави Горан Ѓоргоноски, менаџер и организатор на кампот.
Новитет во овогодинешното издание е организирањето на промотивни активности на охридскиот плоштад, каде што најмладите кампери ќе се натпреваруваат во мини-ракомет со свои врсници од Охрид и Струга. Овие јавни натпревари имаат за цел да ја доближат играта до пошироката публика и да поттикнат љубов кон спортот кај уште поголем број деца.
Дополнителна вредност на кампот ќе му дадат и гостувањата на македонски ракометни ѕвезди, меѓу кои и најдобрата македонска ракометарка Сара Ристовска, како и Милан Лазаревски, Ненад Костески, и легендите Гоце Георгиевски и Стојанче Стоилов. Преку интерактивни демонстрации и средби со учесниците, тие ќе ја пренесат својата мотивација, искуство и љубовта кон ракометот.
