Голем момент за охридскиот фудбал и за Фудбалскиот сојуз на Охрид. Судиите од овој сојуз бележат нови и значајни успеси, но и признанија – едно од кои добива и европски сјај.
Претседател на ФС Охрид е Диме Попоски, а пак потпретседател е Драган Боцески.
Судијата Фатмир Бафто доби големо признание да биде четври судија на квалификациски натпревар од УЕФА Лигата на шампионите, што ќе се одигра во Грузија.
Ова е врв на една впечатлива судиска кариера, која започна на скромните терени во Општинската лига, за подоцна да стане респектиран арбитар во Првата македонска фудбалска лига, како во машка, така и во женска конкуренција.
Бафто, познат по својата професионалност, сериозност и фудбалска интуиција, е уште еден пример дека со работа, континуитет и посветеност, македонските судии можат да достигнат европско ниво.
Тој е и лиценциран VAR судија, а од Охрид истата лиценца ја поседува и неговиот колега Мишо Ѓеоргиески, кој е A VAR лиценциран судија.
Овој момент е доказ дека ФС Охрид станува значајна судиска база во рамките на македонскиот фудбал, бидејќи има сѐ повеќе судии кои активно судат во Прва и Втора лига, како во машка, така и во женска конкуренција. Дополнително, доста млади судии покажуваат интерес и напредуваат во нивниот развој како фудбалски судии.
“Голема благодарност до Фудбалската федерација на Македонија (ФФМ) и претседателот Масар Омерагиќ”, истакнаа од ФС Охрид за Спортска Мрежа.
Ваквиот развој претставува историски и мотивирачки поттик за сите млади судии, а ФС Охрид покажува дека има сериозен капацитет и визија за иднината.
