Македонскиот фудбалер Марио Илиевски ја продолжува својата интернационална кариера, овојпат во Косово. Дваесет и три годишниот напаѓач се пресели во редовите на косовскиот прволигаш Приштина, потврди клубот преку официјално соопштение.
По заминувањето од Бугарија, каде што настапуваше за ЦСКА Софија, Илиевски избра нов предизвик во косовското првенство, каде ќе се обиде да се наметне како клучен играч во офанзивата на Приштина.
„Среќен сум поради овој трансфер, ова е одличен клуб и среќен сум што сум дел од Приштина. Можам да ветам дека ќе дадам сè од себе на секој натпревар за да се борам за титулата и повторно да играм во Европа,“ изјави Илиевски.
Илиевски има богато репрезентативно искуство – беше дел од сите младински категории на македонската репрезентација, а има и еден настап за А-селекцијата.
Во својата досегашна клупска кариера ги носеше дресовите на Вардар Неготино, Септември Софија, Тиквеш, Кишварда и ЦСКА Софија.
