Андријана Поп Арсова обезбеди учество на Светското првенство во атлетика што ќе се одржи во Токио, Јапонија од 13 до 21 септември откако го исполни квалификацискиот критериум преку ранкинг-системот на Светската атлетика. Таа се најде меѓу најдобрите 100 маратонки во светот, со што заслужено ќе настапи на најголемата светска атлетска сцена.
Поп Арсова испиша историја како прва македонска атлетичарка што ќе учествува на три последователни светски првенства – по настапите во Орегон и Будимпешта, сега следува и Токио. На две од овие три првенства таа го исполни и официјалниот квалификациски критериум, што го потврдува нејзиниот квалитет и континуитет во елитната светска атлетика.
Покрај Андријана, Македонија во Токио ќе ја претставува и нашиот најдобар атлетичар Дарио Ивановски, кој ќе настапи исто така во дисциплината маратон. Ивановски е национален рекордер и повеќекратен балкански шампион, кој со своите настапи веќе подолго време се наоѓа меѓу најдобрите атлетичари во регионот. Неговиот настап во Токио ќе биде уште една шанса за да ја потврди својата форма и да се претстави достојно на светската сцена.
