Прволигашот Струга Трим Лум го потврди своето прво засилување за новата сезона а тоа е италијанскиот голман Марко Анџелети. Дваесет и четиригодишниот чувар на мрежата пристигнува со цел да внесе дополнителна конкуренција на голманската позиција, како и свежина и искуство стекнато во Италија и на Гибралтар.
Анџелети е роден на 24 април 2001 година и потекнува од академијата на италијанскиот клуб Специја, каде ги мина сите младински категории. На 19-годишна возраст го оствари својот сениорски деби настап во тимот на Понтедера, а потоа бранеше за неколку екипи во пониските италијански лиги. Минатото лето се пресели во клубот Европа од Гибралтар, каде го мина последниот дел од својата кариера.
“Можам да кажам дека добивме голман со перспективи, голман за иднината. Со оглед на тоа што Италија секогаш произведува добри голмани, верувавме во Анџелети, за кого верувам дека ќе биде првиот италијански голман што ќе биде дел од Првата лига. Се надеваме дека брзо ќе се аклиматизира со тимот, кој од денес ќе ја започне фазата на подготовка за новата сезона”, рече спортскиот директор, Бесарт Исаку.
По завршувањето на својата интернационална авантура на Гибралтар, Анџелети одлучи да го прифати предизвикот и да ја продолжи кариерата во македонскиот шампионат. Понудата од Струга Трим Љум ја гледа како важен чекор напред и нова можност за напредок, а со голема мотивација и желба за докажување ќе се обиде да остави силен впечаток во Првата македонска фудбалска лига.
