Новиот прволигаш Арсими продолжува сериозно да се подготвува за својата дебитантска сезона во елитата на македонскиот фудбал. Раководството на клубот интензивно работи на оформување на тимот, а најновото име во ростерот е искусниот дефанзивец Башким Велиу.
Триесет и едногодишниот Велиу доаѓа од редовите на Беса, а во својата досегашна кариера настапуваше за неколку реномирани клубови како Шкендија и Ренова, додека интернационално искуство стекна во албанскиот прволигаш Лачи. Станува збор за играч кој важи за сигурен и стабилен столб во одбраната, со изразена борбеност, лидерски способности и врвна физичка подготвеност.
Ангажманот на Велиу е уште еден показател за сериозните амбиции на клубот од Боговиње. Со неговото приклучување, Арсими добива значајно засилување на дефанзивниот план, но и играч со карактер и искуство кој може да биде од клучно значење во адаптацијата на тимот во најсилната конкуренција.
Клубот најави дека работата на трансфер-пазарот ќе продолжи, со цел да се изгради квалитетен и компактен состав кој ќе биде достоен ривал на секој противник во ПМФЛ.
