Женскиот ракометен клуб Металург Автокоманда продолжува со засилувањето на ростерот за сезоната 2025/26, а најновото име на списокот на засилувања е искусната голманка Слободанка Кицеска. Родум од Струга, Кицеска е ракометарка со богато искуство, препознатлива по својата борбеност, страст за игра и победнички менталитет.
Таа во кариерата настапуваше за неколку македонски клубови, меѓу кои Вардар Јуниор, Чаир и Стружанка нејзиниот матичен клуб, а најзначајниот ангажман ѝ беше во актуелниот шампион Ѓорче Петров, каде што ги бранеше боите до крајот на минатата сезона.
Со оваа аквизиција, Металург Автокоманда добива сигурност и квалитет меѓу стативите, што ќе биде клучно во амбициозниот настап на домашната сцена и во Европскиот Куп на ЕХФ. Претходно, клубот веќе ги обезбеди потписите на неколку ракометарки како Ива Божиноска, Анастасија Николовска, Петра Јершек, Ана Марија Коларовска и Сара Ристовска, а договорите беа продолжени со клучните имиња од досегашниот состав.
Минатата сезона, Металург Автокоманда заврши како второпласиран тим во домашното првенство и беше дел од завршниот турнир во Купот на Македонија. Новата сезона носи нови предизвици, а ангажманот на Кицеска е само уште еден доказ за сериозниот пристап и јасните цели на клубот.
